又到每日嘅 iPhone 6S 劇透節目時間，今日我哋搵嚟外國網站 9To5Mac 嘅 Mark Gurman，佢過往都有透露過唔少可靠嘅 Apple 產品消息。
最近佢又引述消息人士指，iPhone 6S 同 iPhone 6S Plus 除咗一如傳聞，後鏡頭會升級至 12MP 像素之外，仲會支援 4K 拍片，同 Samsung Galaxy S5 睇齊喎。手機拍片成為大趨勢，Apple 若果真係加入 4K 拍片功能，相信能夠吸引唔少用家換機喎。
除此之外，佢仲話新機將會喺前鏡頭加入閃光燈功能，不過就唔係直接加入 LED 閃光燈，而係影相時亮起白屏幕補光。前鏡頭亦將會加入全景拍攝同 720p 慢鏡影片模式咁話。
發布會就鐵定 9 月 9 日舉行啦，唔知大家又期唔期待呢？不過 Mark Gurman 就話，當日只會有 iPhone 6S 同 6S Plus，4 吋嘅 iPhone 6C 就暫時冇份，要再等等。有傳 Apple 內部正研發緊一款同 iPhone 4S 一樣嘅 3.5 吋細芒 iPhone，唔通 Apple 想嚟個復古潮？
來源: 9to5Mac