iPhone 作為 Apple 旗艦手機，售價高之餘又保值，唔單止喺神洲大地值錢，喺世界各地亦吸引大批人追捧，甚至惹來不法之徒覬覦，扭盡六壬從 Apple Store 偷走 iPhone。點偷法？著件藍色 Tee，扮「精靈」大搖大擺拎機。
據外媒報道，美國紐約兩名男子於當地時間 6 月 1 日著上藍色T裇，打扮成 Apple Store 「精靈」員工般混入店內，約 5:30pm 其中一人進入電子維修房，於抽屜內拿走 19 部 iPhone，一共價值 $16,130 美元（約 $125,195 港元），藏於衣服下，然後與同黨雙雙由大門口逃去。紐約警方正調查案件，目前未有人被捕，Apple 方面未有對此作任何評論。
據報今次已經是今年內第三次同類案件，2 月紐約亦曾經有 1 名盜賊喬裝成 Apple 員工，與 2 名同黨偷走 8 部 iPhone，損失超過 $5,000美元；3 月時，1 名盜賊扮成「精靈」，與 2 名同黨合力從「天才吧」偷走 59 部 iPhone，共值 $44,000。雖然話「精靈」嘅制服時不時都會轉吓，近期香港嘅精靈就換成醒目嘅綠色，但仍然沿用簡單嘅 T 裇設計，只係心口加上蘋果 Logo，人多繁忙時真係好易魚目混珠架。
來源：Huffingtonpost
