是咁的，家陣嘅玩物要成功流行有幾大元素，一同上畫中電影有關；二，有特別限量版；三，貴；四，好很貴。美國珠寶金飾公司 Kay Jewelers 就同迪士尼合作，用 18k 黃金同 18卡鑽石，打造 4 吋高、1.5 磅重嘅 BB-8，全世界只得一隻，估價要 $135,000 美元，即過百萬港元，真係帝國級數嘅玩具呀。
據報呢隻金鑽版 BB-8 鑲有 860 粒鑽石，耗時超過 600 小時設計及打造機器人身體，內裡中空，再用人手逐粒將鑽石鑲上。咁矜貴豪華嘅 BB-8，又點捨得輕易賣出去呢？呢隻金鑽版 BB-8 將會喺下星期三紐約舉行嘅 Force 4 Fashion 活動上拍賣，聽個名都知，活動主題係星戰啦；而拍賣所得嘅款項就會全數捐予當地醫院，為「Star Wars: Force For Change」籌款。你以為美國人沉迷星戰先諗到星戰金飾系列？其實香港周大福都有出售星戰系列金飾，人類已經阻止唔到星戰聯乘商品啦！
來源：CNET