這邊廂，警方大力打擊白牌車，對 Uber 窮追猛打，司機個個嗌驚驚，搵食啫搞到要拉要罰……那邊廂，另一場革命悄悄降臨，一間聲稱「港產、土炮、非紅色」的 Call 車公司「Cetah」（音同「Cheetah」），近日連番出現在 Uber 司機內部群組，打著旗號「比 Uber 更合法的叫車平台」，明搶Uber司機過檔。點樣比 Uber 更合法？Cetah 相當神秘，話會用「雞脾」嘅方法收錢，1 隻雞脾大約等於 1 蚊美金，全程唔用現金交易，連信用卡都唔用。咦～咁樣係咪真係合法先？
特點一：找數用「雞脾」
Cetah 要到 7 號才正式推出，但司機今日下午 5 時起已經可以在網上率先註冊，Facebook 專頁亦已經開始運作，透露部分此 Call 車平台的運作資訊。據指 Cetah 主要利用代幣「雞脾」交易，乘客畀錢買咗「雞脾」後，就可以搭車；「雞脾」價值將會在乘客信用卡內扣除，但詳細交易程序有待公布。
特點二：自由定價
一隻「雞脾」價值約相等於 1 蚊美金。每程車的價格由司機自行釐定，但設有價錢下限，以及車數限制。你問，自由市場下司機咪好揀客？係架，據悉司機個 App 喺接單前已經睇到閣下嘅目的地，再決定開咩價；不過乘客都有權選擇上，定唔上。
特點三：VIP 司機預約 Call 車
Uber 等 Call 車 App 嘅其中一個不便之處，係只支援即時 Call 車，冇得預約一兩個鐘後或第二日要車，如果第二日晨早出發去機場想話今晚 Book 定車都唔得。Cetah 就整咗個 VIP 司機制度，按司機接單量計算 VIP Level，而 Level 1 以上嘅司機就可以接受預約 Call 車。乘客介面可以睇到司機嘅 Level。對司機嚟講亦都係多勞多得，因為 Level 愈高，抽佣就愈少。
 |  |
比 Uber 更合法？
Cetah 處處揚言自己「比 Uber 更合法」，吸引司機過檔，講明貨 Van、私家車、跑車、七人車甚至 P 牌統統都可以先登記，不限車齡。登記亦係只需要牌簿、行車保險、行車證等基本資料，未有要求出租汽車許可證。找數畀司機的方法就用美金做單位，幾時找數就好彈性，由司機自己定，詳情有待公布。Cetah 就聲稱自己有方法解決警察放蛇，仲話「仲絕過一鍵刪除」，係咁咪堅先？唯 Cetah 方面拒絕訪問，指詳情要待 App 正式推出後方會公布。
真係合法？律師咁講：
不涉及現金交易，係咪就合法呢？本刊就此向譚黃律師事務所合夥人之一梁永鏗律師查詢，梁永鏗律師指司機若未持有有效的出租汽車許可證，不論交收現金或「雞脾」，只要涉及商業性質行為，均算是收取酬勞，可被視為取酬載客，屬違法行為。此外，招攬或企圖招攬他人乘坐以出租或取酬方式載客的輕型貨車及私家車，亦屬違法。此法例不止涵蓋於司機，亦包括營業的第三方 App 平台。他又提到車輛若果未持有商用車應有的第三方保險，亦會構成危險。