暑假即將結束，但夏季仍然未完結，係時候抓住夏天的尾巴衝到海灘。沙灘排球愈來愈流行，就連瑞士表廠 Swatch 都特地為呢項運動推出全新運動智能手表 Touch Zero One，仲加入擊球同擊掌等特設嘅功能，啱晒各位健兒啦。
Touch Zero One 採用觸控式屏幕，並有專屬手機 App 分析數據。手表除了具備一般智能手表的計步和計時功能，亦特地針對沙灘排球運動，加入各「擊球」功能，手表內置的傳感器會記錄佩戴手腕的擊球次數及每次擊球的力度；比賽結束後，用戶亦可透過手機 App 分析平均擊球力度、單次擊球力度及所耗卡路里等數據。呢項功能唔止沙排，其他運動例如排球、網球、乒乓球等等都適用。
排球隊員間經常會互相擊掌打氣，看台上嘅觀眾亦會投入鼓掌，Touch Zero One 嘅「擊掌」功能就會計算用戶擊掌嘅次數及平均力度，並以數值顯示出來。係有少少無聊，不過知道自己拍手有幾大力都幾盞鬼（係，我的確係諗起人妖打排球：「教練，我要大～大～力！」）。
Touch Zero One 嘅訓練模式亦相當有趣，完成會日嘅目標後，「教練」會獎閣下一杯雪糕；愈接近目標，杯雪糕就愈大。不過計女版主話，Touch Zero One 最吸引嘅地方係採用 Swatch 專用電池，官方指毋需每日充電，續航力都有幾個月。
Touch Zero One 系列將於 9 月 10 日推出，官方 App 支援 iOS 及 Android 版本，每款定價 $1,080。