睇間諜片，不時見到有間諜將隻 USB 手指插落電腦，瞬間就清除晒部機上嘅資料。現實中，戰鬥民族嘅安全研究人員就研究出新一代「殺腦武器」－USB Killer。
唔好以為呢隻係普通嘅 USB 手指，其實佢係一隻網絡武器，一插落部電腦，兩秒內就可以破壞主底板，令部電腦係咁先，變成黑畫面，有片為證。負責研發嘅俄羅斯團隊 Dark Purple 仲話，手指可以應用於電視、路由器，甚至經 OTG 插落手機，全部通殺。網站未有詳述技術原理，只表示新嘅 USB Killer 2.0 會重覆輸出 -220V 電壓，造成破壞。睇片就好驚驚啦，不過 Dark Purple 就話硬碟未有受到波及，所以一切數據都會喺返晒度，換過塊板就可以拎返晒啲資料。換言之 USB Killer 只會 Kill 主底板，唔會 Kill 數據，唔使諗住當間諜武器用嚟洗底。
來源:habrahabr.ru