公廁一般畀人嘅印象都係污污糟糟、陰陰暗暗、一地水跡，可能仲會聯想到好多衰嘢……乜都有啦。但最近就有場「廁所革命」，唔係小記自己作出嚟，而係中國大陸官方定嘅。話說上個月係「世界廁所日暨中國廁所革命宣傳日」，北京為響應，就喺房山區起咗個創新設計嘅公廁，叫「第 5 空間」，仲勁過第四度空間。
 |  |
第 5 空間據指係第五代公廁（唔好問前四代係點），除咗有基本嘅廁所同淋浴間之外，仲有 ATM 自動櫃員機、手機充電座、電動車充電座、智能資源回收筒（智能在於回收完廢物後，會送返張電子優惠劵畀你）、Wi-Fi、自動販賣機等等，喂唔好講笑，真係吸引到好多本地人同遊客特登去參觀架，據講仲有人特登留低睇埋廁所裡面播放嘅環保教育短片添架！而且公廁本身都融入環保概念，用洗手盆回收嘅污水嚟沖廁，節約用水。聽落好高科技呀，第日要痴免費 Wi-Fi 唔止去咖啡店啦，去公廁啦！
來源: 北京房山政府網站