「櫈登櫈登！隨意門！」無論你叫佢做叮噹還是多啦A夢，呢把聲可謂男女老幼都非常熟悉，最親切是你。可惜，背後聲音演繹的功臣：配音員林保全，於今早逝世，享年63歲。各位想再度懷緬熟悉的叮噹聲音，除了返煲劇集或坐時光機，最後機會就係將於農曆新年期間上畫的電影版《STAND BY ME: 多啦A夢 3D》，電影公司方面已確認，粵語版配音全部由林保全聲演。
林保全為資深配音員，1973年起加入無線電視配音組，多年來曾經為多個大家耳熟能詳的角色配音。但講到最深入民心，林保全的配音作始終是《叮噹》。《叮噹》為日本漫畫家藤子·F·不二雄的作品，故事主角叮噹（又譯「多啦A夢」）是隻來自22世紀的貓型機械人，受主人野比世修所託，回到20世紀，照顧及幫助世修的高祖父野比大雄。漫畫自1969年起連載了1345回，曾發行短篇單行本50冊，大長篇漫畫有17本。電影版最早於1982年上映，今年上映的《STAND BY ME: 多啦A夢 3D》已經是第19部電影，亦是林保全聲演叮噹的最後一部作品。
叮噹：來自22世紀的藍色貓型機器人，身上百寶袋裡面的道具多到數都數唔晒。最怕老鼠，因為耳朵被老鼠咬掉；最鍾意食豆沙包，去到邊都要食。至於後來點解要將「叮噹」譯成「多啦A夢」，普遍認為是發音更接近日文原音「Doraemon」；不過小記實在叫慣咗叮噹，改唔到口。
大雄：設定為不幸的小男孩，讀書、運動冇樣叻，成日俾人蝦，但心地善良。於香港電視版為大雄配音的原配音員盧素娟，於2006年亦病逝，令人惋惜。
靜宜：大雄的同學，典型好好學生，品學兼優，愛拉小提琴，在《叮噹大富翁》裡潔癖嚴重到每4局會沖一次涼。
牙擦仔：有錢，有錢，同好有錢。喜歡任何機械同模型等新玩具，亦愛晒命和賣弄小聰明，不過心地始終都唔係壞。
技安：大牙擦仔隻兼惡死，平時最鍾意同阿福一齊欺負大雄為樂。喜歡唱歌但歌藝麻麻。弱點係怕媽媽。妹妹技蘭原本係大雄的未來老婆，但叮噹的出現改寫了歷史。
出木杉：大雄的同學，全級第一的資優生，靚仔之餘琴棋書畫樣樣皆精，係大雄嘅假想敵。
叮鈴：叮噹的妹妹，性能比哥哥好，間唔中會亂入拯救大家。
叮噹嚟啦！歷代主題曲大回顧
話說由叮噹變成多啦A夢，唔止係不同年代換左譯名咁簡單，連主題曲都換咗幾次！你又屬於邊個年代嘅主題曲？
一代：環星兒童合唱團
二代：陳慧琳
三代：廖碧兒
第四代：謝安琪