《任天堂明星大亂鬥特別版》禮拜五就會正式出街，分分鐘今日都已經有舖頭攞出嚟，呢隻 game 多人期待就肯定㗎喇，特別係有返一定 game 齡嘅朋友。不過相信大家都會有個疑問，點解喺單人模式嘅開始，卡比會係唯一生還嗰個，係製作人櫻井政博嘅私心、定真係有特別原因呢？
講返少少背景先，喺最後一輯 Super Smash Bros. Ultimate Direct 嘅尾段公開咗一條有關單人故事模式「燈火之星」嘅預告，內容係大亂鬥裡面幾乎所有角色都俾魔王 Galeem 發射嘅光線打中而消失（抄 Marvel 變灰 !? ），剩係得卡比騎住佢粒星穿越咗去另一個星球先至避過一劫。
[ot-video][/ot-video]
點解會懷疑呢個係櫻井嘅私心？因為《星の卡比》系列係佢喺 HAL 研究所嗰陣一手創作，可以話係親生仔，不過佢之前就喺 Fami 通嘅專欄否認呢個係佢嘅私心：「為咗令到呢個生還者更加有說服力，我哋要揀一個速度上可以贏到 Galeem 嘅角色，所以我哋一開始就排除咗只係得『一般』能力嘅角色。跟住因為 Galeem 嘅攻擊範圍係整個星球，所以識得短距離嘅瞬移都冇用，只係得返可以違反物理定律嘅角色可以揀。大家可能已經唔記得，其實卡比粒星喺第一隻 game 已經可以扭曲時空，所以卡比成為咗其中一個生還者有力人選。我哋仲有考慮過 Bayonetta 同 Palutena ，不過佢哋兩個嘅敵人都喺『燈火之星』模式裡面，所以似乎佢哋唔太大機會可以避過第一次嘅攻擊。」
[row][double_paragraph]
[/double_paragraph][double_paragraph]
[/double_paragraph] [/row]
解釋即係掩飾，即係私心啦 ww（講笑）。其實如果真係喺卡比、 Bayonetta 同 Palutena 三個裡面揀，咁揀卡比又真係合理啲嘅，起碼識卡比嘅人會多啲，而且卡比係初代 8 人之一，唔揀佢，咁你話揀邊個喇？
題外話，將「灯火の星」調轉讀，「星の火灯」嘅日文發音咪就係「星のカービィ（星の卡比）」囉！
《任天堂明星大亂鬥 Special 》將於 12 月 7 日推出。