自 Google Cardboard 令 VR 虛擬實境技術平民化後，VR 之風愈吹愈熱，相關 App 和裝置猶如雨後春筍，除了打機、睇片，連航拍機都玩埋一份，配合 VR 眼鏡，就可以用第一身視角（First-Person View, FPV）睇到航拍機鏡頭上的景觀，投入感 Up。
今屆香港會議展覽中心舉行的香港玩具展中，有不少廠商均以航拍機為主打產品，尋求出口商機；大會更特設飛行示範區，由各單位流輪示範航拍機功能。E-Supply International Ltd 旗下全新香港品牌 KONSEPT VR32 智能虛實場景航拍機就將 VR 技術融入航拍機，產品更獲本年度「最佳大童獎」。
VR32 航拍機具備 720p 鏡頭，可透過 Wi-Fi 連接手機 App 或遙控器操控；而在手機安裝專用 App，放入特製的 VR 眼鏡後，就可以透過連接鏡頭，第一身「睇」驗飛行效果，但就仍需倚賴遙控器或 App 操控飛機。飛機可外置 SD 卡，亦內置氣壓定高、一鍵返航、無頭模式等功能，操控範圍約 80 米，但因屬入門級別，續航力只得 6 分鐘（不過戴住 VR 眼鏡睇太耐都會頭暈）。此機預計 2 月底有售，定價港幣 $999。
另一廠商驍騰亦有推出入門級航拍機，其中一款 XT 002 亦有配合 VR 眼鏡，同樣可用第一身視角，觀看機身 720P 鏡頭的飛行感受。另一特色是飛機具有「不倒翁」式設計，具有半球形膠邊包著機翼，減少機翼撞到障礙物時造成的損毀，亦防止對人構成危險，落地時亦會自動回彈至機身向上位置。此機續航力 15 分鐘，亦具備基本的一鍵返航、無頭模式等功能。雖然呢款機暫時香港就未有得賣，但按趨勢來看，VR 航拍機將會大熱。