坊間成日都話，Android 平台唔安全易中毒，到底有幾唔安全呢？英國權威學府劍橋大學就進行咗一項研究，統計 Android 手機廠商及網絡營運商為系統安全更新的頻密度，從而得出一個安全值。報告顯示，平均 87% 嘅 Android 裝置有面對至少 11 個嚴重漏洞；而當中 Nexus 就相對較為安全，10 分滿分佢得到 5.17 分，親生仔係叻嘅。
劍橋大學利用 20,400 部手機進行研究，採用 FUM 標準測量 Android 手機安全值。F 代表無嚴重漏洞的裝置；U 代表更新至最新版本的裝置；M 代表廠商仍未在任何裝置上修正的漏洞的數量。Nexus 嘅整體得分表現比較好，當中又以 LG 代工嘅最出色，得分達 3.97，比Motorola 代工嘅高 0.9 分。
以型號計，排榜首嘅係 2011 年推出嘅 Galaxy Nexus，安全值有 4.71 分；其次為 Nexus 4 同 Nexus 7。榜尾嘅 Symphony Xplorer W68 於 2013 年由 Motorola 生產，名都未聽過就知香港冇人用；而排尾二同尾四嘅，原來分別係 Samsung Galaxy Note II 同 Galaxy S4，連 0.3 分都冇。
咁到底係邊個嘅責任呢？劍橋方面就認為，廠商有一定責任，可以去做更多嘢去等用戶知道有安全更新，甚至迫佢哋安裝。而網絡營運商亦責無旁貸，等幾耐先發放更新相當重要。講到尾，仲有個好重要嘅角色，用戶。
最高學府用咗個比喻去解釋安全風險：檸檬市場。廠商知道裝置目前安唔安全，幾時要更新，但消費者就唔清楚，造成資訊不對稱，久而久之廠商就冇乜動力去提供更新。點解同檸檬市場有關？明嘅自然明！