雖然電競係咪運動嘅爭議依然不斷，但今年嘅印尼亞運，電競作為試驗項目尚算順利完成，當然仲有唔少改善嘅空間。而喺 2022 年上海亞運電競就會係正式項目，所以唔少人都相信電競喺兩三屆之後嘅奧運會成為其中一個項目。
不過之前國際奧委會主席 Thomas Bach 就講過現時主流嘅電競遊戲好多都含有暴力、歧視嘅內容，同講求和平同友誼嘅奧運精神相違背。最近國際奧委會又有新講法——電競入奧嘅討論尚未成熟。
上個週末喺瑞士就舉辦咗奧林匹克高峰會（ Olympic Summit ），會裡面提到委員會理解部分電競遊戲需要投放嘅心力、準備同其他已經列為正式比賽項目嘅運動員相約，但對於一啲相對休閒嘅電子遊戲就唔需要，所以委員會應該先進一步討論電競係咪可以視為運動。另外，委員會認遊戲公司之間嘅商業競爭導致成個行業非常分裂，以商業為主導亦都同奧運以運動價值行先嘅諗法唔同。
雖然短時間內都唔會見到電競成為奧運項目，但國際奧委會現階段都係願意作進一步嘅討論，至少對零暴力成份嘅運動相關遊戲持比較開放嘅態度。
資料內源：dualshockers