防疫措施再放寬，卡拉 OK 、 Party Room 、酒吧等處所重開，市面人潮即時湧現，都係嘅，大家都餓咗咁耐，可以再出返街食飯、飲嘢、玩樂，當然係第一時間報復式出街，一於吃喝玩樂個夠，所以市面又回復返 以往嘅塞車、塞人，不過點都好過成條街啲舖頭閂晒門、落晒閘，人唔多個、車又唔多架，搞到好似死城一樣咁嘅，總之可以慢慢回復正常生活，當然係好事啦。
講到回復正常生活，去旅行都係正常生活嘅一部分嚟，之但係疫情以嚟，大家閉關至今，真係無病都屈到病，隨住愈嚟愈多地方逐漸解封，香港人最渴望去嘅日本，終於響上星期都話將會於 5 月尾開始放寬入境限制，可以比小型旅行團入境，當大家聽到呢個消息時，應該都會好似編者咁即刻「 Yeah! 跳起！」，可惜聽埋落去，事實係起初只會開放比美國、澳洲、泰國同埋新加坡嘅小型旅行團入境，發覺竟然係無香港份嘅時候，難免即時「嘘聲四起」啦！
雖然仲未有得去日本，但日本連鎖店嚟香港開店似乎已成潮流，講緊嘅就係響 apm 開設 1 號店嘅松本清喇，由於疫情關係， 1 號店延遲至 5.11 號至開幕，不過唔緊要，當編者每日返工經過都見到條人龍，係排到圍住嗰層打咗個圈嘅時候，就知道大家對日本嘢仲係幾咁熱愛喇！而一個禮拜後，響沙田新城市廣場嘅 2 號店亦正式登場，嚟緊 6 月中應該仲會有屯門嘅 3 號店，可以話係繼 Don Don Donki 後，又一間掀起日本熱嘅連鎖店呀！
不過有日本連鎖店嚟香港開店，但響日本當地繼續有大型連鎖店閉店嘅消息，仲記得舊年講過池袋嗰邊有個閉店潮，港人熟悉嘅 TOKYU HANDS 、 SILKHAT 池袋遊戲店、 Bic Cam 池袋東口 Camera 館都難逃閉店厄運，估唔到嚟緊連新宿東口嘅 BICQLO 都話將會響 6.19 閉店，呢間響正新宿超旺位置嘅大型店舖，係由 Bic Cam 同埋 Uniqlo 聯乘，所以店名亦叫做 BICQLO ，響 2012.09 開店至今，爭幾個月先至做夠 10 年，估唔到最後要分手收場，事關 BICQLO 並非完全結業，只是 Uniqlo 退出，現有嘅其他層數及舖位由 Bic Cam 全部接手，變成全幢都係 Bic Cam，相信到時會改返做「BicCamera 新宿東口店」。
老實講，呢間 BICQLO 其實好正好好行，因為可以行完 Bic Cam 順便掃埋 Uniqlo ，或者男嘅行 Bic Cam 、女嘅行 Uniqlo 分頭行動，可惜下次去嘅時候已經無得咁行法喇！好彩之前去旅行時影過吓啲相，但就無特登 selfie 打卡囉！確實可惜…… 之但係又咁講，舊嘅唔去新嘅唔嚟，希望當疫情過去，市道回復好景時，會有多啲大型嘅連鎖店甚至聯乘嘅連鎖店出現，通關後就可以報復式咁狂行亂掃啦！