之前已經講過自 9 月尾開始，實體發佈會係報復式咁爆出嚟，上個禮拜直頭係到達另一個頂峰，實體發佈會加埋網上發佈會，仲有 iPhone 12 開賣，總之成個禮拜個人都係「榮榮哋」，而呢個發佈會潮，今個禮拜有機會放緩一下，但估計嚟緊響疫情第四波之前嘅呢個穩定期，應該都會繼續爆彩呀！
好喇，呢兩個禮拜個個都講 iPhone ，編者就稍為避一下，費事等各位讀者大大由頭睇到落尾都係 iPhone 啦！查實上個禮拜編者收到件產品都好值得講吓，就係嚟自LG嘅新「機」，不過呢部新「機」並唔係大家諗嘅嗰部新「機」，即係識轉芒變成「 T 」字型嗰 LG Wing 喎，岔開少少話題先，其實呢部機嘅水貨已返仲賣斷市，如果有心等行貨嘅話，編者收到可靠消息，呢部機有港行嘅機會係零咁滯，所以想入手嘅話都係買水貨啦！
講返正題先，編者試過咁多唔同類型、款式嘅新機，呢款機都係第一次試，講緊嘅就係 LG 嘅「 PuriCare 穿戴式空氣清新機」，講明話係穿戴式，就梗係唔係大大座或掛頸嗰啲，而係戴響面部嘅，說穿了咪就係口罩款嘅空氣清新機囉！
編者就好鍾意佢嘅賣相喇，雖然只得白色，但外型設計到好似 Star Wars 嘅白兵咁款，戴咗之後成個人都型晒，梗係啦…淨係睇到對眼之嘛！希望日後 LG 會出其他色啦，因為白色對編者嚟講有啲難搞，實在好易整污糟。
PuriCare 左右兩邊各有一個可更換嘅 H13 HEPA Filter ，個 Filter 放響風扇面層，而風扇轉速分三種快慢，最高速係適合做運動時用，家陣法例放寬咗做運動如跑步可以唔戴口罩，但若果係有擔心而又想做運動時有較舒適嘅保護，呢部清新機就非常適用喇！
話明係空氣清氣機，就梗係要用電啦，用 USB-C 叉兩粒鐘就滿電，使用時間係 4-8 粒鐘，睇你用咩風扇轉速；而嚟緊仲會有個 UV 保護盒，除咗可以用嚟
充電，仲有可殺菌嘅紫外光燈 UV-LED ，用完之後放入個盒就可以消毒喇，呢
個盒仲支援《 ThinQ 》 app ，提醒你幾時要換濾網，不過要另買喇。
編者試戴過之後，覺得比一般嘅口罩重咗啲，但如果係戴開「豬咀」嘅話就會覺得輕鬆好多，而開著之後內裡會有空氣流動，有少少戴呼吸機嘅感覺，不過空氣就涼快好多，而且入面仲有個可更換嘅內部濾網以防飛沫，只要小心處理每次用完即掉個內部濾網，就唔使太擔心衞生問題喇。
呢部 PuriCare 穿戴式空氣清新機響上星期四即係 10 月 22 號開賣，據知香港係首發地區，仲係全球首賣𠻹，仲早過韓國呀！想買可以去各大電器連鎖店搵搵，售價係 HK$1,180 ，兩片裝 H13 HEAP 濾網同埋內部濾網都係賣 HK$98 ，大約一個月就要添置一次。最後都係嗰句，疫情反復，大家唔可以鬆懈！要好好保護自己同身邊嘅人呀！