成日返鄉下嘅 Pokémon 粉絲，有無諗過搭飛機會有比卡超話你知機上安全資訊呢？全日空 ANA 最近就宣佈同 Pokémon 再聯乘，推出「機上安全」影片，由比卡超親身講解機上安全，咁生動實入腦好多啦！
平時搭飛機，起飛前都會有機上安全影片比乘客睇，亦會有空姐空少親身示範點樣綁安全帶、著救生衣，等乘客了解搭飛機時要注意嘅安全事項；為咗吸引乘客能夠接收到呢啲機上安全資訊，ANA 就搵咗 Pokémon 合作，響指定航班推出全球首部「Pokémon 機上安全」影片，等乘客可以更留心注意。
其實舊年 2023 年，ANA 已經推出咗印有 Pikachu 及 Eevee 機身圖案嘅飛機，其中香港亦有機會搭到 Pikachu 嘅飛機來回成田及香港，而「Pokémon 機上安全」影片就已經響 8 月中開始，響 Pikachu 及 Eevee 飛機上播放，直至 2028 年為止，即係話粉絲們唔使心急，大把時間比你搭飛機睇比卡超嘅影片。
至於呢條機上安全影片嘅長度為 4:48，影片其實係夾雜動畫及真人拍攝，當中再有 Pokémon 角式穿插，影片有日文及英文兩種語言，亦提供手語；除咗機上安全影片，ANA 同時亦釋出一段「降機」嘅 Pokémon 特別版影片，故事係比卡超降落後走失咗，最後比地勤人員搵返。如果暫時未搭到 Pikachu 飛機嘅話都唔緊要，呢條機上安全及降機影片響 ANA 嘅 YouTube 頻道都睇得到㗎！大家又講唔講得出影片中出現過嘅 Pokémon 嘅名呢？
最後提提大家，響香港搭到嘅比卡超飛機 Pikachu Jet NH（JA894A），航班係 NH811、NH812，由成田⇔香港，至於依貝飛機 Eevee Jet NH（JA784A）就只限成田或羽田⇔美國嘅三藩市、芝加哥、紐約，以及成田⇔倫敦；機上有好多 Pokémon 嘅元素，例如空姐制服、頭墊、音樂等，亦有好多 Pokémon 紀念品，加埋呢個安全影片，又提升咗 Pokémon 飛機嘅完整度，唔知遲啲會唔會有空姐空少 cosplay Pokémon 角式，或者有得捉《Pokémon Go》嘅特別版神獸咁呢？
ANA × Pokémon「機上安全」影片：https://www.youtube.com/watch?v=SAolvci7SeA
ANA × Pokémon「降機」影片：https://www.youtube.com/watch?v=WFabb4IDEt0