大家成日都會去淘寶買平嘢，如果響淘寶有樣兩百幾萬人仔嘅「寶貝」，又會唔會吸引到你去… 睇吓呢？近日就有間中國企業，響淘寶發售一架「無人駕駛載人航空器」寶貝，真係唔淘都要埋嚟睇吓！
呢架「無人駕駛載人航空器」型號係 EH216-S，由來自中國，自稱城市空中交通科技企業嘅億航智能科技製造，產地響廣東雲浮市，早於 2023 年 10 月 EH216-S 攞咗中國民航局頒發嘅型號合格證（Type Certificate），官方稱已充份符合中國民航局嘅安全標準與適航要求，具備無人駕駛航空器載人商業營運資格，即係話佢係一部無人駕駛嘅「空中的士」，而佢亦可應用於物流運輸、醫療急救等用途。
官方就話，呢架 EH216-S 係世界首部無人駕駛電動垂直昇降（eVTOL）嘅航空器，機身睇落就似無咗尾嘅直昇機咁，而螺旋漿就用咗航拍無人機嘅八臂設計，每條臂都係用咗共軸雙漿動力佈局，至於機身用咗輕量化碳纖復合物料，官方稱硬淨又耐用。
EH216-S 嘅機鎗內有兩個座位，可一次過載最多兩位乘客，座位更用咗「類 F1 賽車」人體工學座椅，真係要坐過至知「類」成點喇；EH216-S 只要預先設定好飛行航線，智能導航系統就可以作點對點飛行，機鎗入面亦有兩部 9.7” 平板電腦顯示航程等資訊，加上有 LTE 專網通訊唔怕失聯，不過唔知啱唔啱香港用喇。
EH216-S 用純電力發動，使用工業電源充電，所以有快充功能，但作為商業用途嘅 EH216-S，需要配合大型嘅後台支援，所以並唔係一般普通用家啱買。而呢架 EH216-S 響淘寶嘅售價係 RMB2,390,000（換算約 HK$2,640,000），不過睇呢個價錢，都似係做宣傳多過真係買嘢啦；如果真係響淘寶買呢架 EH216-S 嘅話，唔知可唔可以叫店主直接將部 EH216-S 飛過去買家指定地點收貨呢？咁咪可以慳埋運費囉～
EH216-S「寶貝」淘址：https://item.taobao.com/item.htm?id=762914533896&spm=a1z10.5-c-s.w4002-25263220906.11.705e2986aG6uBT&skuId=5426384699463