近日全球 DJI 於官網舉辦優惠活動，已解禁的香港當然都有份，而且有多款無人機有優惠，通常做得呢個動作，似乎係有新機嚟緊會出喎… 咁啱網上亦有新機嘅消息流出，又會咁啱嘅？
有留意 DJI 的朋友，早幾日應開始收到 DJI 的 EDM，關於「DJI 趣拍節」的活動，將於 6 月尾舉行優惠，其中包括多款無人機及運動相機，連 Mini 3 Pro 買機都有嘢送，其他有優惠嘅仲有 Mini 3、Air 2S 同埋 Action 2 運動相機，不過要留意是無人機並非減價，只是買機送配件或 DJI Care，反而 Action 2 由於代理已降價，DJI 官網個價較高及只送 DJI 幣，所以唔算太吸引，而且此優惠需要先安裝《DJI Store》app，如果是新手想買機的話不妨一試。
通常搞優惠清貨，都係就嚟出新機之時，咁啱早前網上就流出 DJI 新機消息，於來自 Quadro_News 一段 Twitter 片段中可見，一架貼了多張貼紙的無人機放在地上，外形跟 Mavic 3 系列有點相似，由於片段只有 5 秒，而且是邊行邊拍較為模糊，估計攝錄時是起飛前，片段中大約見到鏡頭部分似用上雙鏡設計，另亦有一些相關相片包括電池等，同樣是比較模糊，難以睇清楚，而消息指此機就是 Air 3。
回看同系列的 Air 2S 已經是 2021 年 4 月推出，換句話說已有 2 年多時間，加上 Mavic 及 Mini 系列都已推出新型號，甚至連電影級的 Inspire 系列也有新機登場，所以今年 DJI 再出新消費級無人機的話，就剩下 Air 系列而已，因此這說法亦不無道理。
繼試機影片流出後，早幾日航拍世家的 Twitter 又貼出相片，內容是有人收到 DJI 的包裏，盒面大大張白紙黑字寫著：「開箱時間 2023 年 6 月 28 日，嚴禁提前開箱！！！」另一方面，又有人發現一間網上商店，更新了無人機的資料庫，並找到一個名為「DJI Air 3 Fly More Combo (DJI RC-N2)」的項目，眼利的航拍友可會留意到所跟的遙控型號為 RC-N2，即現時 RC-N1 的新版本，亦即 Mavic 3、3 Classic、Mini 3、3 Pro 等適用的遙控，換句話說，若真的有 Air 3 的話，所跟的遙控會是新版本。
雖然網上已流出新機的片段及相片，但到目前為止，DJI 官方仍未正式公佈新無人機發佈的消息，而觀乎優惠活動的內容，就算 6 月 28 日有新機發佈，或者未必是新無人機，而是運動相機 Action 系列也說不定呢，咁就真係要密切留意近期 DJI 的官方消息。