編者一向都好小心自己嘅手機，因為工作關係，平時身上起碼都有 2 至 3 部手機跟身，每次搭完車、食完嘢都一定會檢查清楚有無漏低嘢，所以好耐無試過唔見嘢喇，印象中唔見銀包都只係試過兩次，其中一次有好心人執到搵得返，而手機就更加未試過唔見，因為除咗自己私人嘅兩部之外，好多時都係帶住幾部手機去試嘢，例如影相呀、測速呀咁，點不知早排就真係「破咗例」，不過總算有驚無險⋯
事緣係一次搭巴士去深水埗時，竟然唔見咗部 ZenFone 6 ，起初都未發覺唔見手機仲行咗陣，後來要用手機嘅時候發覺無咗，當刻梗係驚一驚啦，好彩嘅係編者就算係借返嚟試嘅手機都會開「 Find My Device 」功能，於是即時用另一部手機去「搵機」啦，一搵之下部 ZenFone 6 竟然係響奧海城，原來部機係漏咗響巴士跟埋去總站啦。
知道部 ZenFone 6 響邊，咁梗係拿拿聲飛的去搵啦，途中不知幾驚架巴士會開車走咗呀！最後去到巴士站搵到架巴士，亦搵到司機大佬開車門，編者於是「響住機」去上層搵，結果⋯⋯當然係搵得返部機啦，原來部機係跌咗落去窗口座位側邊條罅度，如果唔係有聲響，真係估唔到會楔咗落條罅咁隱閉呀！
今次好彩搵得返部機，全因有用到「 Find My Device 」功能，所以編者強烈建議大家要開呢個功能，因為未必次次都咁好彩會搵得返，萬一真係咁唔好彩比人執咗搵唔返嘅話，都可以用「清除裝置」功能洗機嘛！當然係要部機有電同開著咗先得啦，所以最好都係小心啲唔好唔見嘢喇！
之前響度講過台灣 COMPUTEX 2020 會改期至今年嘅 9.28-30 號舉行，當時編者都有提過外地參展商、買家、訪客嘅問題，終於響上星期五，COMPUTEX 主辦單位宣佈，由於「新冠病毒肺炎 COVID-19 疫情肆虐全球，基於海外參展商、國際買主及媒體恐無法如期來臺等不確定因素」，最
終決定取消。
正如之前所講，就算台灣本身疫情控制得好，但外國情況仲係好嚴峻，如果無人嚟嘅話都係無用，所以今次取消都係正常；查實編者個人覺得，今年2020一整年都唔適宜搞呢類大型展覽會，甚至乎連旅行都唔應該去，等全球疫情真真正正完全受控先再搞、再去都唔遲，編者都忍得好辛苦，你估我唔想去外地嘅發佈會、展覽會同旅行咩！既然都忍咗咁耐，唔爭在忍多一排，總好過前功盡癈吖嘛，係咪先！？