疫情令全港市面繼續淡靜，同時確診、初確數字幾何級數飆升，編輯部先後亦有同事因住所需要強檢而被迫 WFH ，直至有檢測報告證明安全至可以返公司；上星期終於輪到編者，因為所住嘅屋苑座數響星期四列入強制檢測名單，除咗要去強檢之外，為咗安全起見，編者都要同其他同事一樣 WFH 幾日，不過最大問題係，編者 用嚟開工嘅 Notebook 放咗響公司，雖然有好大部分工序可以遙距做，但做起上嚟就係有啲唔方便囉。
有見好多人都要再次 WFH ，所以今期「 Cover Story 」就做咗個居家抗疫嘅題目，由於大家都對 WFH 有經驗，所以今次就會講吓 WFH 時，點樣可以透過 online 應付生活上嘅需要，相信對大家都會好有用嘅！
呢排有好多重要嘅體育賽事，其中最矚目之一就係 Olympic Winter Games 冬季奧運會，而冬奧啱啱響尋日 20 號（星期日）閉幕，執筆之時仲係星期五，仲有兩日嘅賽事，難得今次冬奧係同一 timezone ，唔使捱夜都可以睇到直播賽事，除咗唔同嘅滑雪項目，仲有編者好鍾意嘅冰球、冰壼、單板同滑冰等，加上疫情關係無得去旅行，呢兩年想滑雪、玩雪都無機會，睇住冬奧真係好想去北海道呀！
今屆冬奧最特別嘅地方之一，就係有 VR 內容睇，雖然唔係 VR 直播，但有啲 miss 咗嘅賽事想睇返，仲可以用 VR 嚟睇，事關 CMHK 獲得今屆冬奧嘅香港獨家 VR VOD 轉播權，只要響手機、平板裝《 UTV 》呢個 app ，就可以睇到 VR 冬奧嘅賽事精華喇。睇 VR 冬奧時預設係 VR 360 全景模式，只要上下左右郁部手機，就睇到 360° 嘅全景比賽畫面，如果你有 VR 眼鏡嘅話，又可以開個 Goggle Mode ，再戴住 VR 眼鏡就睇到立體嘅比賽畫面喇，話時話，咁樣睇冬奧又真係幾過癮喎。
我知⋯你哋會話出書時冬奧已經閉幕，咁咪睇唔到 VR 冬奧囉！放心喎，由於 CMHK 今次係 VOD 形式轉播，而 VR 嘅內容係會提供至 2.28 ，所以仲有成個禮拜可以 睇返，仲有一樣好重要嘅，不論係咪 CMHK 嘅客戶，只要裝《 UTV 》就睇得㗎喇。