一般 Office 格局都係希望打工仔「六根清靜」，四面白牆再加部電腦，有 Pantry 已經萬幸，又枯燥又無味；但如果 Office 有乒乓波枱、睡房同車仔麵檔的話，會唔會想索性留喺公司瞓呢？Google 就有呢種五星級的 Office。
Google 位於銅鑼灣的香港辦公室最近擴充，加租一層新樓層，裝修依然秉承一貫破格的作風，用色七彩繽紛之餘，仲有好多非常貼心嘅設施，處處「員工為先」。一入門口映入眼簾自然係「Google」招牌，順帶一提 Google 向來保安嚴密，出入都要登記姓名拎專用嘅名牌以茲識辨。辦公室走廊牆上掛滿滑板，唔好以為只係用嚟裝飾，Google 員工真係會拎落嚟踩板架！
穿過走廊，就到員工休息室，入面有齊飲品吧、三文治吧、果汁吧，仲有：Nooooooodle 粉麵檔！員工都讚車仔麵式嘅粉麵檔選擇多，午餐唔使煩惱。除此之外仲有乒乓波枱、迷你桌球枱同其他棋類遊戲畀員工得閒放鬆身心，仲有間睡房放埋四張床畀大家做到累時眠一眠，不過真係有人夠膽入去瞓嗎？
參觀完 Google 辦公室，是咪好葡萄好想成為科技巨頭嘅一分子呢？睇返 Google 香港招聘中嘅職位都唔少，大部分同市場營銷有關，技術開發就相對較少。聽講面試時主要著重你對公司同職位了解程度，同埋創意及執行能力，反而英文就係次要。筍工呢家嘢，有時真係可遇不可求，上網見到啱就好申請啦喂。