前幾日介紹過 K11 與藝發局合作舉辦的藝術展 Electronic Vibes 《電‧藝‧感》，今日我就去到 K11 試玩虛擬實境（VR）藝術創作，仲喺 Design Store 試玩 VR 模擬飛行器，真係夠晒過癮。現場仲有法國著名多元藝術家 Valèry Grancher 利用 VR 現場創作，依家就由我話你知，邊幾個 check point 唔可以錯過啦。
依家至 6 月 22 日，只要喺下午 2 時至 9 時走入 K11 範圍的露天廣場，就會睇到大屏幕上不斷有一群群烏蠅繞住影像範圍內活動的參加者，只要參加者靜止唔郁，烏蠅就會飛走。唔想比啲烏蠅跟住，就唯有停落黎，《蠅像》的藝術家希望透過此作品，讓大家停落黎，珍惜每個短暫時刻。
由露天廣場行入中庭，自然會見到香港著名建築師 Betty Ng 設計的虛擬實境體驗區，體驗區在設計靈感來自虛擬與實境之間的相對性與衝突，中庭設置兩個體驗區，經過的途人都可以觀看到參加者玩 VR 時的動作，透過面前四個屏幕，作為旁觀者都睇到參加者所畫的創作，唔知參加者會點樣利用 VR 創作去表達意念呢？
即日至 6 月 19 日，逢星期一至五由下午 5 時至 9 時；星期六中午 12 時至 10 時；星期日及公眾假期下午 1 時至 9 時，大家都可以試玩。小記戴住個頭戴式裝置，用兩個無線控制器，喺白色雪人背景下，畫左啲星星同埋藍色雪。哩次 VR 體驗唔同平時玩虛擬遊戲，好似喺立體空間畫小畫家，大家都係睇返藝術家 Valèry Grancher 於 5 月 29 日及 6 月 4 日的示範創作吧。
既然 VR 仲未可以普及，同場還有 Design Store 與 JetOne Motion 合作，使用 Powered by Asus 的電腦，配合三個屏幕組成一個寬視角俾大家試玩，我就趁住人少少走去玩呢個用模擬飛行器。坐喺駕駛位上面，畫面猶如真實處於真實的駕駛倉一樣，原來哩個模擬器，將成為澳洲航空學校於九龍區提供練習的唯一地點。如果大家有興趣，可以喺下年 5 月之前試下哩個飛行模擬器，不過價錢都唔平，30 分鐘要 $980 起。
