喺今年年頭 CES 大會上， Samsung 發表息指下一代智能雪櫃將採用 Android 系統，會配備同類產品中最大嘅屏幕。最近終於有喇，哩部智能雪櫃四門設計，有 21.5 吋觸控屏幕，仲喺雪櫃入面裝咗部相機，唔使開門都畀你睇到入面有咩，而佢索價 $5,600 美元，折合大約港幣 $43,490，睇下佢有幾巴閉啦。
雪櫃外形除咗多個觸控屏之外，無咩特別。屋企人可以透過屏幕睇到天氣同日曆等，亦可以寫低「今晚唔食飯」哩啲留言，仲可以利用附設購物程式。用 MasterCard 過數網上買餸，都咪話唔方便，會唔會大洗咗就真係試過先知。最好就係佢內置鏡頭，唔使開雪櫃就知入面有乜，連接埋裝咗相應程式嘅手機，唔使記低補倉要買咩，即時喺超市睇手機就知喇。
有無試過成日都唔記得雪櫃有咩，搞到啲食物壞咗發臭先知呢？最啱繁忙都市人嘅，就係記低雪櫃入面飲品食品仲有幾耐過期嘅功能。哩個功能提供日數標籤，只要拉到相應食品飲品上，咪可以清晰了解佢地仲有幾多日夠期囉。咁如果個雪櫃滿晒，後面啲食品被遮住，咪又會唔知囉？
哩個雪櫃可以為大家帶來方便，只不過索價四萬幾，不如大家乖乖地，勤啲留意個雪櫃入面有咩食仲好啦。再唔係，貼多幾塊告示貼，提醒自己啲餸幾時夠期咪仲好。
來源：Cnet
