PC 電腦成日都聽到人用冷卻系統，尤其係電競電腦，但今次呢個叫做 ICEMAG 嘅產品都內置 Active Cooling 主動式冷卻系統，不過佢竟然係一個外置充電器，而且仲有 MagSafe 功能𠻹。
俗稱「尿袋」嘅外置充電器，隨著 iPhone 12 有磁吸式充電功能開始，市面愈嚟愈多 MagSafe 尿袋，不過好多時邊充邊用都會發覺有啲熱，有啲品質參差嘅甚至會出現興興哋嘅情況，唔止揸響手感覺唔係咁好，有時甚至驚會「爆袋」，因此外國就有製造商，開發了一個備有 Active Cooling 主動式冷卻系統嘅尿袋，為 iPhone 充電時能夠有效散熱，唔使再擔心。
ICEMAG 睇落同一般尿袋無乜分別，但細心留意尿袋外邊底部，係一個透明殼嘅設計，可以睇到內部零件，而右邊就有一把 8,000rpm 渦輪散熱風扇，就係呢個 Active Cooling 散熱系統，能夠將尿袋內嘅熱力抽走，同時有 RGB 燈圍住個把風扇，操作時會係咁閃吓閃吓。
ICEMAG 內置 10,000mAh 鋰電池，提供無線充電及 USB-C 有線快充，無線充電支援 MagSafe、QC 3.0、QC 4.0，有線充電就支援 PD 2.0、PD 3.0 等制式，輸出方面，無線充電為 7.5W，有線充電最高達 20W，除了為 iPhone 充電，亦可為 Apple Watch 及 AirPod 充電，而且可 MagSafe 及 USB-C 同時為兩個裝置充電，十分方便
ICEMAG 表面用上冰感矽膠物料，為 iPhone 充電時有涼快手感，重量為 225g，不算太重，反而 18mm 感覺較厚身；另外，ICEMAG 提供多種保護，如短路保護、過充過放保護、輸出/入過壓保護、溫度保護等，可謂做足安全措施。ICEMAG 售價為 US$59.99，換算約 HK$470。