《Minecraft》新遊戲《Minecraft Legends》推出了一個月左右，粉絲們進度如何呢？咁啱 Uniqlo 趁《Minecraft Legends》出街時，又 cross-over 推出一系列《Minecraft》UT，唔知著住嚟打新 game，又會唔會醒神啲！
玩開《Minecraft》嘅朋友都知，響呢個方塊世界入面有無限可能，只要你有創意就可以打造出屬於自己風格嘅元宇宙，所以遊戲推出以嚟深受大人細路歡迎，可以話係一款長青嘅遊戲；最近 Uniqlo 就推出咗一系列《Minecraft》UT，不過就只限小朋友款式，如果屋企嘅小朋友鍾意玩《Minecraft》嘅話，就真係要買返件比佢哋著住嚟玩喇。
《Minecraft》系列 UT 總共有 6 款，淨係見到心口嘅方塊圖案已經夠搶眼，著住出街一定知道你係《Minecraft》躉；每件短袖 Minecraft UT 售價為 HK$79，另外仲有 4 款 Minecraft 短褲，售價為 HK$59。
講開 Minecraft，屬於主遊戲嘅外傳《Minecraft Legends》出咗無耐，唔知大家又有無玩呢？呢個遊戲嘅故事大概係玩家要挺身而出，捍衛呢個被豬布林蹂躝變成癈土嘅主世界。《Minecraft Legends》屬於動作類策略遊戲嘅《Minecraft Legends》，當然繼承《Minecraft》一貫玩法，除了要收集資源及創建元素外，更需要即時戰鬥，為呢個熟悉嘅方塊世界帶嚟一點新意，而且整體玩法亦有別一般即時戰略遊戲，相信無論係 Minecraft 粉絲，或者係即時戰略遊戲迷，都會鍾意玩《Minecraft Legends》。
唔知小朋友著住成套 Minecraft UT 嚟玩《Minecraft Legends》又會唔會勁啲呢！不過，各位小朋友記住，打機唔可以沉迷，打一陣就要抖吓先得㗎。